انا على المقناص .. حامد الضبعان ..

بسمـ الله الرحمن الرحيمـ ..


السلامـ عليكمـ ورحمة الله وبركاته ..


انشودة المقناص للمنشد المبدع المتألق .. حامد الضبعان ..


وهذي ابياتها ..

أنا على المقناص قلبي يرفي

فترة ونرجع يم اهلنا مناكيف

بديار لفروق الحبارى تلفي

جنوب من حزم الجلاميد وطريف

الطير هو غاية غرامي وشفي

اقدره تقدير الاجواد للضيف

من كبر قدره شايله فوق كفي

وارعاه تسع شهور بالقيظ والصيف

و ادهله لاشفت ريشه مصفي

على الدعو واخفف النسر تخفيف

نقله يشرفني وشوفه يكفي

عن شوف ناس ما تعرف المعاريف

لاشفت لي نور بروقه ترفي

نويت اجهز موتري للتكاليف

القيظ كله جالس(ن) ومتعفي

وبرد المكيف نشف الدم تنشيف

متى سموم القيظ عنا تقفي

وسهيل قبل يعمد الفجر قد شيف

والنار يصلح شبها للتدفي

والبرد نوجس من نسيمه هفاهيف

وقمنا لعزبتنا نشيل ونضفي

ونكمل الناقص ونملا المطاريف

واللي نشيل من اللوازم مكفي

ومكتفين العفش بالحبل تكتيف

ويمكن اليا جينا البقالة نوفي

حاجات نشريها كمالة مصاريف

والصبح من حزم ابرقيه مقفي

صوب المعظم والهضاب المقاييف

بديار جعل اشجارها ما تجفي

تعلها غر المزون المراديف

في رفقة اللي نارهم ما تطفي

على الشرف والجود ربع مواليف

مجلاس طلقين الشوارب بصفي

على الدلال اللي بهن ساخن الكيف

خويهم ما اوجس كلامٍ يحفي

غير المزوح الطيبة والسواليف

عقال وزن عقولهم ما يخفي

ولاهم على الفاضي خفاف وملاقيف


للحفظ .. كلك يمين ومن ثم حفظ الهدف باسمـ ,.. الله يحفظنا لوالدينا ..

http://www.epda3.net/iv/download.php?ID=379